Saggio in vernacolo, La caduta degli angeli  di Nicola Paparo

Tutti abbiamo appreso, ancora fanciulli, nelle ore di catechismo, il tradimento degli angeli a Dio ribelli, od a Scuola, studiando il terzo canto dell’Inferno Dantesco; ma si é chiesto mai qualcuno come “andarono le cose” nei particolari? Nicola Paparo, poeta dialettale, nella sua verve lirica, in modo semplice ed originale, ma assai geniale, ricostruisce personaggi ed ambiente, frutto in gran parte della sua fervida fantasia. Mi sento privilegiato di essere autorizzato dall’autore a pubblicare i versi assolutamente inediti di questa larga parte del secondo capitolo del poemetto “Et verbum caro factum est”.  (Dialetto scandalese).  A cura di Francesco Cosco.

 Il poeta in vernacolo Nicola Paparo

Canto II

Serafini e cherubini,

anciulicchj malandrini,

ccu trombett’e bombardini

flaut’i pell’e tamburrini,

‘ncielu priestu pripararu

tirantell’e concertini

e si miser’a sunari,

quandu l’anciulu Gabrieli

ritornàu ccu fra’ Rafeli.

‘Nu cudazz’e mienzi pazzi

ppi dispiatt’i Rafelazzu

ca faciva ru gaddruzzu

si ‘ncazzaru e scioperaru

e Lucifar’acclamaru

cuoma capu, e ru purtaru

supr’e spaddre paru, paru.

-Vi rincrazzu, frati cari,

libertà, paci ed amuri

vi prumintu ccu ru cori;

simu stuff’i suppurtari

l’arroganza d’u Signuri;

si continua sa vitazza,

‘mcunu juornu pia ‘na mazza,

ni curram’e ‘ntra lu puzzu

pua ni jetta morza morza. –

- Jamu, jamu, simu tanti,

fatti sutta, fatt’avanti,

iddru resta ccu ri santi,

ti facimu nua potenti. –

Mali ficiaru li cunti,

ch’a da vucca du punenti

Dio sbucàu ccu ‘nu tridenti

e cci li salàu li cronti!

Quandu furu ‘mpacci’a scioddra

l’allurdàu ccù crita moddra

e ‘ntr’u ‘mpiernu spalancatu

li calau cuomu dannati.

- Satanassu, Satanassu,

fà lu rre ‘mienzu ssi fissi,

spruppaccill’a tutti l’osse

e di pua stujat’u mussu.

Sturdutizzi ppe ‘ra scossa

tutt’insiemi ‘ntra na fossa

si truvaru peddr’e ossa.

Chianu chianu s’allargaru,

ppi ri manu si pigghjaru

e si misar’a ballari.

Ogni tantu ‘ntra lu scuru

se sentìa ‘ncunu languru.

‘Ncazzatizzo Satanassu

pija due petr’e ‘re salassa;

foc’ardente ‘ntra l’abbissu

fa sbampari chiddra mossa.

Tutt’u ‘mpiernu si fa russu:

timpe, ‘mpari, tremp’e fosse.

‘U diavulu pinnutu,

re ‘i l’abissu ‘ncurunatu,

li danati straguisati,

priestu chjama d’a ricota.

- Nu’ vi ‘ndi pintiti, frati,

vi prumintu ca la vita

cca davieru vi scialati. –

Cuomu frati s’abbrazzaru,

ma lu dente ebbar’amaru

quandu corna ‘ncapu a paru

chianu, chianu li spuntaru.

........................................